ಈಶಾನ್ಯ ಚುನಾವಣೆ: ತ್ರಿಪುರಾ, ನಾಗಾಲ್ಯಾಂಡ್‌ನಲ್ಲಿ ಮತ್ತೆ ಕೇಸರಿ ಹವಾ, ಮೇಘಾಲಯ ಅತಂತ್ರ

0

ಹೊಸದಿಲ್ಲಿ: ಈಶಾನ್ಯದ ಮೂರು ರಾಜ್ಯಗಳ ಚುನಾವಣೆಯಲ್ಲಿ ಮಧ್ಯಾಹ್ನದ ವೇಳೆಗೆ ಫಲಿತಾಂಶಗಳು ಬಹುತೇಕ ಸ್ಪಷ್ಟವಾಗತೊಡಗಿವೆ. ನಾಗಾಲ್ಯಾಂಡ್ ಮತ್ತು ತ್ರಿಪುರಾಗಳಲ್ಲಿ ಬಿಜೆಪಿ ಮೈತ್ರಿಕೂಟ ಮರಳಿ ಅಧಿಕಾರ ಹಿಡಿಯುವುದು ಖಚಿತವಾಗಿದೆ. ಇನ್ನು ಮೇಘಾಲಯದಲ್ಲಿಯೂ ಕಮಲ ಪಕ್ಷ ಅಭೂತಪೂರ್ವ ಸಾಧನೆ ಮಾಡಿದ್ದು, ಸರ್ಕಾರದ ರಚನೆಯಲ್ಲಿ ನಿರ್ಣಾಯಕ ಪಾತ್ರ ವಹಿಸುವ ಸಾಧ್ಯತೆ ಇದೆ.

 

ತ್ರಿಪುರಾ ಮತ್ತು ನಾಗಾಲ್ಯಾಂಡ್‌ನಲ್ಲಿ ಎನ್‌ಡಿಎ ಮೈತ್ರಿಕೂಟವು ಬಹುಮತಕ್ಕೆ ಅಗತ್ಯವಿರುವ 31 ಸೀಟುಗಳ ಗಡಿಗಳನ್ನು ದಾಟಿದೆ. ಮಧ್ಯಾಹ್ನ 1 ಗಂಟೆ ವೇಳೆಗೆ ಈ ಎರಡೂ ರಾಜ್ಯಗಳಲ್ಲಿ ಸ್ಪಷ್ಟ ಬಹುಮತದ ಸೂಚನೆ ದೊರಕಿವೆ. ಆದರೆ ಮೇಘಾಲಯದಲ್ಲಿ ಅತಂತ್ರ ಸನ್ನಿವೇಶ ಬಹುತೇಕ ಖಾತರಿಯಾಗಿದೆ.

ನಾಗಾಲ್ಯಾಂಡ್‌ನಲ್ಲಿ ಎನ್‌ಡಿಪಿಪಿ- ಬಿಜೆಪಿ ಮೈತ್ರಿಕೂಟವು 40ಕ್ಕೂ ಹೆಚ್ಚು ಕ್ಷೇತ್ರಗಳಲ್ಲಿ ಮುನ್ನಡೆ ಸಾಧಿಸಿವೆ. ಎನ್‌ಡಿಪಿಪಿ 26 ಮತ್ತು ಬಿಜೆಪಿ 14 ಸೀಟುಗಳಲ್ಲಿ ಮುನ್ನಡೆ ಪಡೆದಿವೆ. ಎನ್‌ಪಿಎಫ್ 3 ಹಾಗೂ ಇತರೆ ಪಕ್ಷಗಳು 17 ಸ್ಥಾನಗಳಲ್ಲಿ ಮುನ್ನಡೆ ಕಾಯ್ದುಕೊಂಡಿರುವುದಾಗಿ ಚುನಾವಣಾ ಆಯೋಗ ಮಾಹಿತಿ ನೀಡಿದೆ. ಕಾಂಗ್ರೆಸ್ ಒಂದೂ ಕ್ಷೇತ್ರದಲ್ಲಿ ತನ್ನ ಪ್ರಾಬಲ್ಯ ಪ್ರದರ್ಶಿಸಿಲ್ಲ.

ತ್ರಿಪುರಾದಲ್ಲಿ ಕಳೆದ ಬಾರಿ ಎಡಪಕ್ಷಗಳನ್ನು ಮೊದಲ ಬಾರಿಗೆ ಅಧಿಕಾರದಿಂದ ಕೆಳಕ್ಕಿಳಿಸಿ ತನ್ನ ಬಾವುಟ ಹಾರಿಸಿದ್ದ ಬಿಜೆಪಿ, ಈ ಸಲವೂ ರಾಜ್ಯದಲ್ಲಿ ಕೇಸರಿ ಪತಾಕೆ ಹಾರಿಸುವ ಸೂಚನೆ ನೀಡಿದೆ. ಅಧಿಕಾರಕ್ಕೆ ಬರಲು 31 ಸೀಟುಗಳ ಅಗತ್ಯವಿದ್ದು, ಬಿಜೆಪಿ 33 ಸೀಟುಗಳಲ್ಲಿ ಮುನ್ನಡೆ ಸಾಧಿಸಿದೆ. ಆದರೆ ಅಂತಿಮ ಫಲಿತಾಂಶದಲ್ಲಿ ಈ ಸಂಖ್ಯೆ ಬದಲಾಗುವ ಸಾಧ್ಯತೆ ಇರುವುದರಿಂದ ಕುತೂಹಲ ಹೆಚ್ಚಿದೆ. ಕಾಂಗ್ರೆಸ್ ಮತ್ತು ಎಡಪಕ್ಷಗಳ ಮೈತ್ರಿಕೂಟವು 15 ಸ್ಥಾನಗಳಲ್ಲಿ ಮುಂದಿವೆ. ಇನ್ನು ಬುಡಕಟ್ಟು ಪ್ರದೇಶಗಳಲ್ಲಿ ಪ್ರಭಾವ ಬೀರಿರುವ ತಿಪ್ರಾ ಪಕ್ಷ 11 ಕಡೆ ಮುನ್ನಡೆ ಸಾಧಿಸಿದೆ.

About Author

Leave a Reply

Your email address will not be published. Required fields are marked *

You may have missed