‘ಗರಡಿ’ ಸಿನಿಮಾದಲ್ಲಿ ಕುಣಿದು ಕುಪ್ಪಳಿಸಿದ ನಟಿ ನಿಶ್ವಿಕಾ ನಾಯ್ಡು
ನಟನೆಯ ಜೊತೆಗೆ ನಟಿ ನಿಶ್ವಿಕಾ ನಾಯ್ಡು ಡ್ಯಾನ್ಸಿಂಗ್ ನಲ್ಲಿ ಎತ್ತಿದ ಕೈ ಅನ್ನೋದು ಪ್ರತಿಯೊಬ್ಬರಿಗು ಗೊತ್ತೆ ಇದೆ. ಸದ್ಯ ನಿಶ್ವಿಕಾ ಯೋಗರಾಜ್ ಭಟ್ ನಿರ್ದೇಶನದ ಗರಡಿ ಸಿನಿಮಾದ ವಿಶೇಷ ಹಾಡೊಂದರಲ್ಲಿ ಬಿಂದಾಸ್ ಆಗಿದ್ದು ಸ್ಟೆಪ್ ಹಾಕಿದ್ದು ಸದ್ಯ ಆ ಹಾಡು ಇದೀಗ ರಿಲೀಸ್ ಆಗಿದೆ.
ನಿರ್ದಶಕ ಯೋಗರಾಜ್ ಭಟ್ ಬರೆದ ‘ಹೊಡಿರೆಲೆ ಹಲಗಿ..’ ಹಾಡು ಇಂದು ಬಿಡುಗಡೆ ಆಗಿದೆ. ಈ ಲಿರಿಕಲ್ ವಿಡಿಯೋದಲ್ಲಿ ಒಂದಷ್ಟು ಡ್ಯಾನ್ಸ್ ಸ್ಟೆಪ್ಗಳ ಝಲಕ್ ತೋರಿಸಲಾಗಿದ್ದು, ಜೊತೆಗೆ ಮೇಕಿಂಗ್ ವಿಡಿಯೋ ಕೂಡ ಇದೆ.
ಕೊರಿಯೋಗ್ರಾಫರ್ ಎ. ಹರ್ಷ ಅವರ ನೃತ್ಯ ನಿರ್ದೇಶನದಲ್ಲಿ ನಿಶ್ವಿಕಾ ನಾಯ್ಡು ಸಖತ್ ಆಗಿ ಕುಣಿದಿದ್ದಾರೆ. ನಿಶ್ಚಿಕಾ ಡ್ಯಾನ್ಸ್ ನೋಡಿ ಪಡ್ಡೆಗಳಿಗೆ ಕಿಕ್ ಏರುವಂತಿದೆ. ವಿ. ಹರಿಕೃಷ್ಣ ಅವರ ಸಂಗೀತ ನಿರ್ದೇಶನದಲ್ಲಿ ‘ಹೊಡಿರೆಲೆ ಹಲಗಿ..’ ಸಾಂಗ್ ಮೂಡಿಬಂದಿದೆ. ಮೇಘನಾ ಹಳಿಯಾಳ್ ಅವರು ಈ ಗೀತೆಗೆ ಧ್ವನಿ ನೀಡಿದ್ದಾರೆ. ‘ಸರೆಗಮಾ ಕನ್ನಡ’ ಮೂಲಕ ಈ ಹಾಡು ಬಿಡುಗಡೆ ಆಗಿದೆ. ಉತ್ತರ ಕರ್ನಾಟಕದ ಸೊಗಡಿನಲ್ಲಿ ಯೋಗರಾಜ್ ಭಟ್ ಅವರು ಈ ಸಾಂಗ್ ಬರೆದಿದ್ದು, ಕಲಾ ನಿರ್ದೇಶಕ ಹೊಸಮನೆ ಮೂರ್ತಿ ಅವರು ಹಾಕಿದ ವಿಶೇಷವಾದ ಸೆಟ್ಗಳಲ್ಲಿ ಇಡೀ ಹಾಡನ್ನು ಚಿತ್ರೀಕರಿಸಲಾಗಿದೆ.
‘ಸೌಮ್ಯ ಫಿಲ್ಮ್ಸ್’ ಮತ್ತು ‘ಕೌರವ ಪ್ರೊಡಕ್ಷನ್ ಹೌಸ್’ ಮೂಲಕ ‘ಗರಡಿ’ ಸಿನಿಮಾ ಸಿದ್ಧವಾಗುತ್ತಿದೆ. ಬಿಸಿ ಪಾಟೀಲ್ ಅವರ ಪತ್ನಿ ವಜನಾ ಪಾಟೀಲ್ ಈ ಚಿತ್ರದ ನಿರ್ಮಾಪಕರು. ಸೂರ್ಯ, ಬಿಸಿ ಪಾಟೀಲ್, ಸೋನಲ್ ಮಾಂಥೆರೋ, ಧರ್ಮಣ್ಣ ಕಡೂರು, ಪೃಥ್ವಿ ಶಾಮನೂರು ಮುಂತಾದವರು ಈ ಸಿನಿಮಾದಲ್ಲಿ ನಟಿಸಿದ್ದಾರೆ. ನಿಶ್ವಿಕಾ ನಾಯ್ಡು ಅವರನ್ನು ಡ್ಯಾನ್ಸಿಂಗ್ ಡಾನ್ ಎಂದು ಚಿತ್ರತಂಡದವರು ಹೊಗಳಿದ್ದಾರೆ. ‘ನಿಶ್ವಿಕಾ ಅವರು ಅದ್ಭುತ ನೃತ್ಯಗಾರ್ತಿ’ ಎಂದು ಯೋಗರಾಜ್ ಭಟ್ ಹೇಳಿದ್ದಾರೆ.
‘ನಾನು 7ನೇ ತರಗತಿಯಲ್ಲಿ ಇದ್ದಾಗ ಒಂದು ರಿಯಾಲಿಟಿ ಶೋನಲ್ಲಿ ಸ್ಪರ್ಧಿಸಿದ್ದೆ. ಆ ಶೋಗೆ ಗೆಸ್ಟ್ ಆಗಿ ಬಿ.ಸಿ. ಪಾಟೀಲ್ ಬಂದಿದ್ದರು. ಇದೇ ಥರ ಟ್ಯಾಲೆಂಟ್ ಮುಂದುವರಿಸಿದ್ರೆ ನೀನು ಹೀರೋಯಿನ್ ಆಗುತ್ತೀಯ ಅಂತ ಅವರು ಅಂದು ನನಗೆ ಹೇಳಿದ್ದರು. ಇಂದು ಅವರ ಸಂಸ್ಥೆಯ ಸಿನಿಮಾದಲ್ಲಿ ನಾನು ಒಂದು ಸಾಂಗ್ಗೆ ಡ್ಯಾನ್ಸ್ ಮಾಡಿದ್ದು ಖುಷಿ ಆಯ್ತು. ನನಗೆ ಡ್ಯಾನ್ಸ್ ಎಂದರೆ ತುಂಬ ಇಷ್ಟ. ನನಗೆ ಬೇಕಾದಂತಹ ಸೂಕ್ತ ಅವಕಾಶ ಇದಾಗಿತ್ತು. ಈ ಸಾಂಗ್ ಯಾವಾಗ ರಿಲೀಸ್ ಆಗತ್ತೋ ಅಂಥ ನಾನು ಕಾಯುತ್ತಿದ್ದೆ. ಯೋಗರಾಜ್ ಭಟ್ ಅವರ ಜೊತೆ ನಾನು ಮೂರು ಸಿನಿಮಾ ಮಾಡಿದ್ದೇನೆ’ ಎಂದು ಸಾಂಗ್ ರಿಲೀಸ್ ಕಾರ್ಯಕ್ರಮದ ವೇದಿಕೆಯಲ್ಲಿ ನಿಶ್ವಿಕಾ ನಾಯ್ಡು ಖುಷಿ ಹಂಚಿಕೊಂಡರು.